咁多年來，唔少朋友查詢 Setup 或者係檢查途中都會有相同疑問：
「點解新結他都需要Setup？」，今日就一齊探討一下。
首先，Setup 係：「根據個人彈奏風格、技術、手感要求再配合結他狀況對結他進行一次『整體性調整』，以將結他調整至最佳狀況，同時滿足結他手對聲音和手感上的要求。」
係唔係結他品牌或者出廠質量有問題先要做Setup 呢？其實唔關事。
如果係雜牌、貼牌、聲稱自己設計，售價又介乎幾百至千幾個類結他，本身製作質素受限於成本同專業知識，結他係「必然」有大大小小唔同問題。係出廠質素欠佳下Setup 固然係需要，但更多情況係本身問題太多，維修費遠遠超過結他本身售價導致被直接拋棄。
咁如果係大牌，例如 Taylor、Martin，甚至係 Collings、Santa Cruz、Huss and Dalton、Bourgeois、Lowden 等等精品級手工琴，又或者係 Beneteau、Water Road、Kevin Ryan、William Laskin 等等大師級製琴師作品，都係要 Setup？
一般大牌，出廠品質比上文提及的自X結他當然較好，但又稱唔上係完美無瑕。大多數情況下，離譜問題的確比較少，但唔少製造上或保養存放不當導致既嘅問題都唔算罕見，例如 Frets Level、Bridge 都係經常有問題嘅部分。
而另一方面，作為追求量產化嘅廠琴，係 Standard Models 上要求嘅係「一致性」同「穩定性」。大牌子係製作結他水平、木材用料上固然有一定保證，但要做到完全按個人需要為結他進行調整就係另一回事。
綜合結他「本身質素」同「個人手感需要」，可以話絕大多數結他出廠後都需要調整。
第二方面，結他品質接近，甚至已達至完美嘅精品級手工琴又點呢？
能夠被稱為「精品級」嘅結他已經接近完美，即使有時出現瑕疵亦唔算難處理，所以係呢個範疇上基本唔需要擔心結他質素問題。
然而，重點係始終欠缺「交流」。《結他士多》認為「人與人之間嘅交流」係Setup上係不可欠缺嘅核心元素。假如製琴者與結他手之間冇連接就難以完全明白結他手真正需要，手感調整就始終有改進空間。
第三方面，製琴師或者 Custom Shop 訂製結他。
頭先係「第二方面」結尾提出「交流」呢個元素，咁去到「第三方面」訂製結他，理論上可以同製琴方提出要求應該算有「交流」啦？
的確，訂製結他上係一定程度可以令結他更接近結他手心目中追求既完美狀態。例如木材選擇、琴頸 Profile、琴身形狀同設計等等都係好直接影響結他手感同聲音。
係訂製過程，自己本身對各種 Custom Options 有冇具體概念？如果係當地代理協助訂製，個代理係有專業知識定吹水 Hard Sales? 事實上，大部分人係踏入手工結他世界時其實都未有足夠經驗，同一木材係唔同製琴師或者設計下可以係兩種截然不同嘅聲音，並唔係單靠上網做功課可以完全理解到，訂製結他到手後感覺不似預期亦算常見。
另一個問題係縱使有過「交流」，始終唔係 Face to Face。正如《結他士多》 Setup 前會直接比唔同 Setting 既結他大家試，就係透過結他手實際感受同我地觀察去拎 Reference 協助設計 Setup，相對地隔空進行 Setup 始終無法做到完美。
最後，係以上三方面之外仲有具體客觀條件影響結他狀況導致需要 Setup。
假設結他100％完美，但係經過運輸、環境變化、溫度濕度、長期保持、保存不當、鬆弦等等影響後，再好既出廠品質都無法保持一致。
另外，為咗方便銷售唔少結他出廠時都會將弦距 Set 得高少少去避免癡 Frets 等問題 (然後又有人亂咁扭頸導致其他問題，暫且表過不提)。
而大家係各個地方試結他個陣，可能或多或少都覺得「嘩！咁難彈！」，原因之一正正係上面提到既影響。
真正度身訂造既 Setup，歡迎黎《結他士多》感受一下。
*******
HK Guitar Store 結他士多
世界級手工結他專門店
結他教學：Fingerstyle、樂理、彈唱、編曲、訂閱內容
結他維修、Setup、翻新修復、
結他Pickup、Amp、CAPO
Whatsapp：57128146
Address：九龍青山道489-491號香港工業中心C座8樓C2室
(荔枝角站C出口步行3分鐘)
********
