#結他論壇 咩叫性價比？買木定買聲？
結他世界，有一個不成文嘅觀念：相同木材，不論品牌或製琴師，越平入手性價比愈高。
入正題之前，再次提醒各位合板或夾板唔算木材，不在討論範圍。
首先，我地用最普遍嘅全單板組合：斯特卡雲杉 (Sitka Spruce) x 印度玫瑰木 (Indian Rosewood)，進行探討。
粗略嚟講，以上木材配置嘅全單板結他，價值 $4xxx – $xxxxxx。冇睇錯，的確係六位數，而現實中接觸過最平嘅幾千蚊全單板「吉他」嚟自某大網購平台。
結他同結他之間，價錢之間個條鴻溝…除咗名氣之外，就係由手工、製作工序、木材等級、結他內部及力木設計等等細節逐小累積形成。
體現出嘅成果就係結他手工品質同聲音上嘅分野。具體例子，可以想像廠琴同手工琴製作上嘅複雜程度同細緻度差距，單單油漆處理涉及步驟可能已經相差十倍以上。
『相同木材，經不同製作及設計會產生聲音同品質上嘅差異。』
以此引申，我哋可以預期係處理不同木材，由其係好似今次圖入面個種木紋豐富、誇張而多變嘅木料上必須具備相應嘅技術同經驗。
具備最頂尖手藝、技術並有足夠能力將每一塊獨一無二嘅木材發揮到極致嘅，絕大多數係精品手工琴廠或者實力製琴師。
相對地，木材價值反而有大概定價。相同品種相同等級下，一般唔可能有幾倍差價。
如果大家有係唔同地方訂製手工琴嘅經驗，會發現唔同牌子之間係木材選擇或升級上價錢未必差太多，反而係基本底價、涉及手工同藝術設計方面嘅細節先會有比較大嘅差異。
所以買手工琴或者搵製琴師造琴，其實主要係買手工同設計。
市場上，有其他人、品牌以比較低嘅價錢，提供相同木材製作結他。佢哋可能係冇咁出名嘅琴廠，甚至係冇人識嘅「老師父」，有時用咩木去整結他都係講「信」字。
一，係製琴技術以及製作細節未到頂級水平，製作上以流水式廠琴製作為主。所以，係相對簡易嘅製作流程、較次一級嘅質素下，價錢得以下調。
另一情況，係製琴者係製琴水平上實質已經不下於手工琴水平，但可能礙於名氣唔夠大而需要藉由降價拓展市場。
結他平咗，獲得相同品種木材，但整體手工同聲音表現差咗，性價比未必高咗。
近年唔少人問「乜乜牌子」用某某木材，平一萬幾千，好抵呀！買唔買好呀？
大家試下換位思考，如果「乜乜牌子」價錢上升到手工琴水平，搵鬼買咩？
「平價用靚木」個 selling point 就係用料同售價，背後捨棄咗嘅係相應程度嘅技術、手工、設計同音色。
咁個問題，其實就變成「結他整體品質」值唔值「結他差價」了。
好似据扒，有人去西餐廳，有人去 米芝蓮，背後其實係買緊食材、烹飪技巧、名氣、服務、環境、擺盤等等，價錢一樣可以係十倍甚至百倍之差。
值唔值，其實就睇你食得出幾多分別，而個分別對你嚟講又有幾重要。
聽到幾多？大聲定細節動態緊要？手感、裝飾同手工又有幾重要？
最尾都係自己決定，最重要搞清楚自己係要聲定要木。
*******
HK Guitar Store服務：
Setup、維修、開聲、教學、演出、安裝pickup、包場活動、結他諮詢等等。
.
Experience Handcrafted Guitars
:
.
RECOMMENDED: Collings, Santa Cruz, Huss&Dalton, aNueNue, Sole
Not for sales or used
: Martin, Taylor, Bourgeois, Lakewood
.
Pickup:
Sunrise, K&K, Skysonic, Mi-Si, Fishman, LRBaggs
Others:
Gotoh, Loxx, Everbamboo, Blue, Tonewoodamp
開放時間：
11:00-21:00 Mon-Fri
12:00-20:00 Sat
14:00-20:00 Sun
其餘時間 敬請預約 度身招呼
Address：九龍青山道489-491號香港工業中心C座8樓C2室
(荔枝角站C出口步行3分鐘)
